Minn għada Manila flok Thake

Minn għada fuq Radio 101, Manila Bottone se timla’ l-ħin li kien ikollu David Thake wara nofs in-nhar. Il-programm ta’ Thake mhux se jerġa’ jibda fl-iskeda tal-ħarifa wara deċiżjoni li ttieħdet mill-Kunsill Amministrattiv immexxi minn Karol Aquilina li laqat żewġ għasafar b’ġebla waħda.

Il-PN se jiffranka l-ħlas li kien jagħti lil David Thake, li kien ta’ ftit anqas minn €1,000 fix-xahar u twaqqfet ukoll Alessia Psaila Zammit li hija kandidata fuq l-istess distrett ta’ Aquilina u li fix-xhur li għaddew kabbret il-popolarita’ tagħha permezz ta’ programmi fuq il-media tal-PN.

Manila intgħażlet biex issodd it-toqba sal-iskeda tal-ħarifa għaliex ma setgħux isibu lil ħaddieħor biex jimla’ dak il-ħin u biex ikunu ‘aġevolawha’ wara li fix-xhur li għaddew waqqfulha l-programm li kienet tagħmel kull filgħodu minħabba diversi argumenti li nqalgħu bejn dak li kien jippreżenta magħha u l-management tal-istazzjon.