Kuntratt fis-settur tal-enerġija ir-raġuni wara l-attakki tal-PN

L-Orizzont dalgħodu żvelat li wara l-attakki fil-konfront tal-Ministru Konrad Mizzi u Keith Schembri Chief of Staff tal-Prim Ministru hemm negozjant li xtara l-informazzjoni, għaddiha lil Simon Busuttil u l-PN għaddiha lil Daphne Caruana Galizia biex tibda kampanja ta’ attakki personali ħalli dan in-negozjant jivvendika ruħhu talli ma ħax il-kuntratt li ried.

Dan in-negozjant tilef kuntratt kompetittiv li għandu x’jaqsam mas-settur tal-enerġija. Għalhekk dan l-attakk fuq id-Deputat Mexxej tal-Partit Laburista, il-Ministru Konrad Mizzi u Keith Schembri bħala persuna li hu qrib il-Prim Ministru.

Din il-persuna taħt gvernijiet Nazzjonalisti kienet involuta f’għadd ta’ kuntratti ta’ privatiżazzjoni ta’ assi ewlenin fil-pajjiż.

L-Orizzont qed tgħid illi kien hu li xtara l-informazzjoni biex jgħaddiha lil Simon Busuttil ħalli jipprova jieħu kapital politiku bil-għan li jipprova jiddistabilizza lil gvern għal gwadann personali tiegħu għaliex mal-PN dejjem gawda u issa jippretendi li jibqa’ jieħu l-istess trattament.

Dan il-gvern jagħmel l-affarijiet b’mod differenti minn ta’ qablu. Madankollu għad hawn min, inkluż in-Nazzjonalisti nfushom li għadhom ikejlu b’xibirhom.

Billi l-PN mistenni jimmonta kampanja biex jolqot l-ekonomija tal-pajjiż b’sensiela ta’ protesti fost affarijiet oħra ħalli jipprova jiddistabbiliżża l-ekonomija ta’ Malta, li hi fost l-aqwa fl-Ewropa, ħataf l-opportunita ta’ din l-informazzjoni miksuba b’ingann ħalli jibda jibni fuqha.

L-informazzjoni kienet ilha għand il-PN għal bosta ġimgħat iżda stennew sal-elezzjoni għal ħatra ta’ Deputat Mexxej biex joħorġuha. L-iżball li għamlu u li qatt ma basru, kien li l-Ministru Konrad Mizzi se jiddikjara hu stess fid-dikjarazzjoni tal-assi ministerjali li għandu trust fi New Zealand.

Fil-Partit Nazzjonalista, ewlenin fosthom nies fid-Dar Ċentrali hemm min għadu ma jistax iniżżilha li m’humiex fil-gvern, għax kienu draw. Għalhekk, b’din il-ferneżija li għandhom biex jieħdu l-poter lesti jagħmlu minn kollox u għalhekk wieħed jistenna li għaż-żmien li ġej l-attakki kontra l-gvern, l-esponenti tiegħu u kontra l-pajjiż ikomplu jiħraxu u jifferoċjaw.

Fil-PN hemm min qed jinsisti li għandha ssir kampanja bħalma kien għamel Eddie Fenech Adami fit-tmeninijiet u ‘l hemm mexjin, imma Simon Busuttil mhux Eddie Fenech Adami.